Hum Tum

આપણા જીવનમાં ઘણા બધા પડાવ હોય છે જેને આપણે અંગ્રેજીમાં Phases કહીએ છે. જેમ જેમ આપણે જીવનના પડાવમાંથી પસાર થવા માંડીએ છે તેમ તેમ આપણો લોકોને, પરિસ્થિતિને અને જીવનને જોવાનો અંદાજ બદલાય છે. એનું કારણ છે જીવનમાં થાયેલા સારા-નરસા અનુભવો અને તમારી સમજમાં ઉમેરાતા પરિમાણો. આવા અનુભવોને જયારે વાર્તામાં ઢાળીએ અને રિયાલિસ્ટિક અને રમૂજ પેદા કરે એવા સંવાદ લખાય ત્યારે હમ-તુમ જેવી ફિલ્મ બને છે.

આ ફિલ્મ 2004 માં રીલીઝ થઇ હતી. ફિલ્મ જોવાનો ચાન્સ મને થિયેટરમાં નથી મળ્યો અથવા એવું કહું કે મેં મીસ કર્યો. પણ એની બધી કસર મેં કોલેજ કાળમાં ફિલ્મની CD ઘસી ઘસી ને કાઢી નાખી છે. આ ફિલ્મ જેટલી વાર મેં જોઈ એટલી વાર નવી લાગી છે. ઘણાને એવું થશે કે આવી કેવી ફિલ્મ છે? એવું બધું કોણ કરે? આતો કાર્ટૂન ફિલ્મ છે. જોવા જઈએ તો કોઈ પણ નવો કન્સેપટ ઈન્ટ્રોડયુસ થાય એટલે તમને એની જોડે સેટ થવામાં તકલીફ થવાની જ, એ પછી Iphone હોય કે એ. આર. રેહમાનનું મ્યુઝિક.

ફિલ્મનું મુખ્ય પાત્ર કરન બિંદાસ છે, ફ્લર્ટ કરે છે, પોતાની મરજીથી જીવે છે, મુંહ ફટ્ટ છે, બદતમીઝ પણ છે. હીરો કહેવાનું એટલે ટાળ્યું કે આ કેરેક્ટર લાર્જર ધેન લાઈફ નથી, એ આપણામાંથી જ કોઈ છે. સૈફનું પાત્ર મને પર્સનલી ગમે છે. એક તો એ હંમેશા પ્રોફેશન ચેન્જ કરતો રહે છે નહીં તો ગર્લફ્રેંડસ. માણસને જે ના મળે અથવા જે ના કરી શકતો હોયને એની માટે હંમેશા આકર્ષણ હોય છે. હું પોતે એનું ઉદાહરણ છું. 😉 સૈફ અને રાનીના ઇન્ટ્રોડકશન સીનમાં બંને નૂડલ્સ જેવી રીતે ખાય છે ત્યારે તમને ખબર પડી જાય કે કરન ઈમ્પરફેક્ટ છે અને રિયા પરફેક્ટ થવાનો ટ્રાય કરી રહી છે. કોઈ પણ વાત માં પરફેક્ટ ના હોવું એ વધારે સારું છે, ઈમ્પ્રુવમેન્ટ નો સ્કોપ રહે છે. પરફેકશન બોરિંગ છે. Beauty Lies In Imperfection. રિયા જેની જોડે મેરેજ કરે છે એ સમીર પણ પરફેક્ટ નથી. અભિષેકના ફાળે આવેલો એક માત્ર ડાયલોગ એનું પ્રૂફ છે.

જતીન-લલીત ની જોડીની છેલ્લી છેલ્લી હીટ ફિલ્મોમાંની એક છે. દરેક સોન્ગ્સ ફ્રેશ લાગે છે અને તેમના અગાઉના મ્યુઝિક કરતા ઘણું અલગ પણ છે. “લડકી કયું” સોંગ અલરેડી કલ્ટ સ્ટેટ્સ પામી ચૂક્યું છે અને એવું કહી શકાય કે આ સોંગથી પ્રસૂન જોશીને હિન્દી ફિલ્મોમાં સારા ગીતકાર તરીકેની ઓળખ મળી. આમ તો આ સોંગમાં પુરુષ અને સ્ત્રી ના પ્રકૃતિ ની હાસ્ય ઝાંખી કરાવી છે. આપણે સોંગ ને એંજોય કરીએ છે પરંતુ કોઈને સમજવામાં રસ નથી. સોંગમાં જે કહ્યું છે એ સમજાઈ જાય અને આપણે સ્વીકારી લઈએ તો હસબન્ડ-વાઈફ, ગર્લ ફ્રેન્ડ – બોય ફ્રેન્ડ ના અડધા ઉપર પ્રોબ્લેમ સોલ્વ થઇ જાય. આ છે ને ભારત-પાકિસ્તાન જેવું છે, ખબર પડે છે પણ સમજવા તૈયાર નથી. આમાં હું પણ આવી ગયો. 😉

જે છોકરાઓ અવળચંડા કે બદમાશ હોય ને એમની ગર્લફ્રેંડસ હંમેશા વધારે હશે. કેમ કે એડવેંચર બધાને ગમે છે, એ લાઈફ હોય કે સ્પોર્ટ્સ. એ પછી લવની ભવાઈ નો સાગર હોય કે હમ-તુમ નો કરન. રિશી કપૂર ફિલ્મનું સરપ્રાઈઝ પેકેજ છે. એને જોઈને જ લાગે કે બિચારા કરનનો કોઈ વાંક જ નથી.. એ તો બાપલો રંગસૂત્રનો માર્યો એવો બન્યો છે.

એક સીનમાં કરન રિયાને સમજાવાનો ટ્રાઈ કરે છે કે, કોઈના જવાથી ઝીંદગી અટકતી નથી પણ એ કદાચ કહી નથી શકતો. રિયા એના ના કહેલા શબ્દો ને સમજી તો જાય છે પણ એની માટે સ્વીકારવું શક્ય નથી. રીયલ લાઈફમાં જો તમારી સાથે એવું કંઈ પણ થાય કે મુશ્કેલી આવે અને તમે દુઃખી રહ્યા કરો તો તમારી સાથે રેહતા બીજાનું શું? લાઈફમાં થોડો “I Don’t Care” વાળો એટિટ્યૂડ રાખવો… તો જ જીવવામાં મજા છે.

સૈફને આમ તો કન્ફુઝડ કેરેક્ટરવાળી ફિલ્મો જ સુટ થાય છે. એની હીટ ફિલ્મો ની લીસ્ટ જોઈએ તો એ પાક્કુ થઇ જાય; હમ સાથ સાથ હૈ, દિલ ચાહતા હૈ, કલ હો ના હો, સલામ નમસ્તે, હમ તુમ, લવ આજ કલ, કોકટેલ વગેરે. એ માણસ શરૂઆતથી જ કન્ફ્યુઝ રહ્યો છે સ્ટાર્ટિંગ ફ્રોમ હીસ ફર્સ્ટ મેરેજ. તમે ક્યારેય શાહરુખ ને જોયો છે આવા રોલ કરતા? ફિલ્મના ડિરેક્ટરે એક વાર કહ્યું હતું કે પેહલા એ આમીર ખાનને કરનના રોલ માટે લેવા માંગતો હતો. સારું થયું ના લીધો.. નહિ તો એ ફિલ્મના આ કેરેક્ટર ને જ કોન્ફ્યુઝ કરી નાખત. મારા આ સ્ટેટમેન્ટ પાર આમીર ભક્તો ને ખોટું લાગવાની પુરી શક્યતા છે.

ફિલ્મની સ્ટોરી માં વચ્ચે જે કાર્ટૂન આવે છે એનાથી પ્રેરાયને મેં “આવારા રાજુ” નામનું કાર્ટૂન કેરેક્ટર ઘડી કાઢ્યું હતું અને સ્ટોરી બોર્ડ પણ બનાવી દીધુ હતું. ઉપરવાળાની મેહરબાની હશે તો ક્યારેક એની પણ રજુઆત કરીશું.

આ ફિલ્મને મળેલી યશ કલગી એ છે કે એ વર્ષના ફિલ્મફેરના બેસ્ટ ડિરેક્ટર નો અવૉર્ડ વીર-ઝારા માટે યશ ચોપરાને નહીં પણ આ ફિલ્મ માટે કુનાલ કોહલી ને મળ્યો હતો. ફિલ્મની જેમ લાઈફમાં પણ तु तू -में में ચાલ્યા જ કરવાની છે અને તો જ લાઈફ માં માજા છે… બાકી બોરિંગ છે. તમારું શું કેહવું છે?

-નિસર્ગ

39987089_10216971844465227_2823245517360726016_n

Advertisements

DDLJ

“દિલવાલે દુલ્હનિયા લે જાયેંગે” 1995 માં રિલીઝ થઇ ત્યારે મમી પપ્પા જોડે અપર ક્લાસમાં ટિકિટ લઈને લક્ષ્મી સિનેમામાં ફિલ્મ જોઈ હતી. રાત્રે આણંદની ફેમસ નાયલોન પાવભાજી ખાઈને ફિલ્મ જોવા ગયા હતા. સાથે આવેલા કાકાએ જયારે સાથે થમ્સઅપ મંગાવી ત્યારે ખબર પડી કે આ કોમ્બિનેશન પણ ટ્રાય કરવા જેવું ખરું. દસ વર્ષની ઉંમરમાં ખબર નહોતી કે ફિલ્મની મારી લાઈફમાં આટલી અસર કરશે. લાઈફના એક તબક્કે તો એવું લાગ્યું કે સાલું આપણી હાલત પણ ફિલ્મના હીરો રાજ જેવી જ થઇ જશે. આ ટોપિકની ચર્ચા થોડી પછી કરીયે :).

આ ફિલ્મ મેં ઓછામાં ઓછી પચાસ વાર જોઈ હશે. ઘણાને વાંચીને થશે “હેં.. આટલો બધો ટાઈમ ક્યાંથી મળે છે?”. મારા વિષે જણાવું તો મેદાનમાં ઓછું અને ટીવી સામે વધારે બેઠો છું. મને એનો કોઈ અફસોસ નથી કેમ કે લાઈફના તેત્રીસમાં વર્ષે પણ મારો ઇન્ટરેસ્ટ એ જ છે અને એમાં જ કઈંક કરી રહ્યા છે એનો આનંદ પણ છે. આ ફિલ્મના કોઈ એક કેરેક્ટરમાં તમે પોતે જેવા હો અથવા તમે જેવા બનવા માંગતા હોય એવા જોઈ શકો છો. એમ જ થોડી વીસ વર્ષ સુધી મરાઠા મંદિરમાં ચાલે? કોઈ કનેક્શન બને તો કઈ માજા આવેને!!

રાજનું કેરેક્ટર બધાજ વય જૂથને અપીલ કરે એવું છે. એના પહેરેલા કોસ્ચુમ્સ આજે પણ રેલેવેન્ટ છે. એની લાઈફ સ્ટાઇલ લોકોનું ડ્રિમ હોય છે. બાપના પૈસે દુનિયા ફરવા મળતી હોય તો કોણ ના પાડે? જવાબ હાજર છે… હું પોતે… મારા મેરેજ પેહલા મારા પપ્પાએ  મને એકલા વિદેશ ફરવા જવાની ઓફર કરી હતી(દુબઇ કે બેંગકોક) પણ આપણે ના પાડી। પછી મેરેજના ખર્ચામાં બજેટ હાલ્યું તો હજુ મેળ પડ્યો નથી.

રાજ અને એના પપ્પાનો રિલેશનની જેમ જનરેશન ગેપ ઓછી હોય તો લાઈફ કેટલી ઈઝી થઈ જાય છે. બાકી સિમરન અને બલદેવસિંઘ જેવા રિલેશનમાં ખુશી ઓછી અને સેક્રિફાઈસ વધારે હોય છે. ફિલ્મના અંતમાં રાજ પણ સેક્રિફાઈસ કરવા તૈયાર થઇ જ જાય છે. લાઈફમાં એજ મહત્વનું છે સેક્રિફાઈસ કરો પણ પ્રયત્ન ન કરવાનો અફસોસ ન રાખો. काश एक बार कोशिश कर ली होती तो कुछ ओर ही आलम होता|

પ્રેમમાં સ્ટ્રગલ હોય તો મજા આવે. જેમ જયનો રાધા જોડે, પ્રેમનો નિશા જોડે એમ રાજનો સિમરન જોડે. ઘણાની સિચુએશન ડીફીકલ્ટ હોય છે નહીતો અમ્રિશપુરી મળવાના ચાન્સીસ પુરેપુરા હોય છે. એક વાર મારા જીવનમાં એવો વણાંક આવ્યો હતો અને મને પણ લાગ્યું કે બીજા દેશમાં નહીતો બીજા સ્ટેટમાં જઈને મારે પણ રાજગીરી કરવાનો વારો આવશે. પણ.. હાશ… બચી ગયા, બાકી ડંડા પડવાના ચાન્સ પુરા હતા.

ફિલ્મનું આખુ આલ્બમ એટલું મસ્ત છે કે જેવો તમારો મૂડ હોય એમ તમારું ફેવરિટ સોંગ પણ ચેન્જ થાય. મારુ મોસ્ટ ઓફ ઘી ટાઈમ ફેવરિટ સોન્ગ છે “હો ગયા હૈ તુઝકો તો પ્યાર સજના”. સાહેબ… પ્રેમ એકની જોડે જ થયો છે પણ વારંવાર થયો છે. પર્સનલી એક અફસોસ એ રહ્યો કે એ વર્ષનો બેસ્ટ મ્યુઝિક ડિરેક્ટર નો એવોર્ડ એ.આર. રેહમાનને મળ્યો.

હિન્દી ફિલ્મ હોય એટલે થોડા illogical સીન પણ હોવાના. આ ફિલ્મમાં પણ છે. કયો હિન્દૂ પોતાના સુપર સ્ટોરમાં બિયરની બોટલ વચ્ચે લક્ષ્મીની મૂર્તિ રાખે? બળદને બાંધવાનો બેલ કેમ પોતાની બેનને ગિફ્ટ આપે? આપણે ના શીખવા જેવી વસ્તુ પેહલા શીખીએ છીએ. એક્ષ્પ્રેસ વે પર લીફ્ટ માંગવાની આદત સીમરને જ શીખવાડી છે પણ આપડે સારું છે પોલીસ પકડવા નથી આવતી.

અમ્રિશપુરીનો એક ડાઈલોગ છે “મૈને કહા થા, મેરા ભરોસા મત તોડના”. સાલું પચ્ચીસ વાર ફિલ્મ જોયી તો બાબુજી ક્યારે સિમરનને આ ડાયલોગ મારે છે એ ના મળ્યો, છેલ્લે મેકિંગ ની DVD લાવી ને જોઈ તો ડીલીટેડ સીનમાં મળ્યો. રાજના મિત્રો બનતા બંન્ને આગળ જઈને ફિલ્મ ડિરેક્ટર્સ પણ બન્યા. આ ફિલ્મમાં કામ કરતા બીજા બે એક્ટર્સ પરમિત અને અનુપમ ખેર પણ ડિરેક્ટર્સ બન્યા. કદાચ એક ફિલ્મના આટલા બધા કેરેક્ટર્સ ડિરેક્ટર બન્યા એ પણ એક રેકોર્ડ કહેવાય. ફિલ્મના પ્રોડ્યૂસર અને સિનેમેટોગ્રાફર પણ ડિરેક્ટર્સ જ છે એ અલગ વાત છે.

દસ-બાર વર્ષની ઉંમરમાં જયારે ખબર પડી કે ફિલ્મનો ડિરેક્ટર ચોવીસ જ વર્ષનો છે ત્યારે મને નવાઈ લાગી. નાના શહેરમાં લોકોને સારો પગાર મળતા વર્ષો વીતી જાય છે અને આ ભાઈ ડિરેક્ટર બની ગયા. પછી એ પણ ખબર પડી કે રાજ કપૂર અને રમેશ સિપ્પી પણ ત્રેવીસ-ચોવીસ વર્ષે ડિરેક્ટર્સ બન્યા હતા. જેમ મોટા થયા તેમ સમજાયું કે ભાઈ આ તો અલગ જ દુનિયા છે, એના ગણિત પણ અલગ હોય છે.

ઘરમાં પેહલી વાર ઈન્ટરનેટ આવ્યું હતું 2004 માં. હું એન્જીનીઅરીંગમાં ભણતો હતો. તમે નહીં માનો પહેલું  સર્ચ ઈન્ટરનેટ પર આદિત્ય ચોપરાના નામનું કર્યું હતું. એનું એક જ ઇન્ટરવ્યૂ મળ્યું એ પણ indiafm.com પર. કદાચ એના સિવાય એક પણ ઇન્ટરવ્યૂ એને આપ્યું નથી. એટલજે બોલિવૂડમાં એ invisible man તરીકે ઓળખાય છે.

ચોપરા અને જોહર એ એટલું બધું પંજાબી પીરસ્યું છે કે હિન્દી ફિલ્મ પંજાબી ગીત વગર પૂરી નથી થતી. હવે કોઈ ગુજરાતી ફિલ્મ મેકર આવે અને ગુજરાતી રસ પીરસે તો મજા આવે. આમ પણ લોકોને “તારક મેહતાના ચશ્મા”ની બહાર આવવાની જરુર છે.

“Come..Fall in Love”

-Nisarg

Dilwale_Dulhania_Le_Jayenge_poster

Popcorn

લાઈફને મેં ફિલ્મની નજરથી જોઈ છે. થોડા ચડાવ-ઉત્તર , થોડા સુખ-દુઃખ, થોડા ડ્રામા, થોડી ટ્રેજેડી, બહુ ઓછી એકશન અને રાજશ્રીની ફિલ્મ જેવો રોમાન્સ. મમ્મી-પપ્પા તરફથી ઘણું મળ્યું પણ ફિલ્મની અસર મારા પર ઘણી રહી. તમે ખુશ તો બીજા ખુશ, બીજા ખુશ તો તમે પણ ખુશ. સાત વર્ષની ઉંમરમાં ઉનાળાના વેકેશનમાં રાત્રે 2 વાગ્યા સુધી “મેરા નામ જોકર” ફિલ્મ ઇન્ટરેસ્ટથી જોઈ હોય તો થોડી અસર તો થાય ને. આપણા જીવનમાં ઘણી બધી સ્ટોરીઝ સાથે ચાલતી હોય છે. જયારે જીવનમાં સુખદ વળાંક આવે તો સમજવું કોઈ સ્ટોરી પુરી થઇ છે, અને જો કોઈ મુસીબત આવી તો સમજવું કે “હમ આપકે હૈ કૌન” માં ભાભી સીડી પરથી પડયા છે. કેમ કે “હમ આપકે હૈ કૌન” પછી “શાદી કે સઈદે ઇફેક્ટસ” નો એક્સપિરિયન્સ તો બધાને થવાનો જ છે. બાકી દુઃખદ વળાંકને ઇંટર્વલ સમજીને પોપકોર્ન ખાઈ લેવાની.

મેં ફિલ્મો વધારે અને સાહિત્ય ઓછા વાંચ્યા છે. કવિતા લખતા અને સ્ટોરીઝ બનાવતા ફિલ્મી સાહિત્યમાંથી જ શીખ્યો છુ. મારી વાતોમાં ફિલ્મી લાઇન્સ કે વન લાઇનર્સ આવતા હોય તો એ ફિલ્મોનો પ્રભાવ જ હોઈ શકે. પ્રોફેશનલ મિત્રોને એની જાણ ઓછી અને નજીકના મિત્રો કદાચ વધારે હશે. હવે હાથમાં અને દિમાગમાં થોડી સળવળ થઇ રહી છે. ફિલ્મોનો મારા પરનો પ્રભાવ અને લાઇફને ફિલ્મના દ્રષ્ટી કોણથી જોવાની જે મજા અને જે સજા થાય છે એ તમારી જોડે શેર કરવી છે. એમાંથી કઈ શીખવા જેવું નહીં હોય પણ મજા આવે એવો પ્રયત્ન કરીશ. થોડા થોડા સમયાંતરે ફિલ્મો સાથેનો મારો રિલેશન અને ફિલ્મની ટ્રીવીયા તમારી સાથે શેર કરવાનો આશય હશે.

તા.ક: લખાણમાં ચીપકાવેલા ઉદાહરણોને કોઈની લાઇફ સાથે ન જોડવા વિનંતી.

– Nisarg

26229754_10215022619255815_2096055519577176181_n